رسالى من الناس الى الاطباء

فقره الناس تعرف والرزق محدود
ودولاب الوكت مگلوب فر بيهه
وعشرة هواي كلش كشفتك دكتور
ومو للناس لله بخمسه سويهه
ألله انطاك رفعه تشيل بيهه الراس
وربك يگدر بلحظات يلغيهه
واذا ترحم الوادم يشهد العباس
سمعتك للعرش ربك يعليهه
بالصدفه الغني يصيبه المرض دكتور
لأن بالراحه هاي الدنيه گاظيهه
وصدگنه المرض ويه الفقير يعيش
لأن بالظيم كل ايام غافيهه
بس فرق الغني عن الفقير هواي
مثل فرق الجبال وفرق واديهه
أذا يشفه الغني ميدگ عليك الباب
واذا يشفه الفقير ايرد يحنيهه
أتخيل احبابك مرضه يا دكتور
وما عندك فلوس الي تداويهه
وماتو والسبب سعر الطبيب هواي
شچم دعوه على الدكتور تدعيهه
أكيد اذنوب عندك لأن مو معصوم
وربك لاتظن الذنوب ناسيهه
تدعيلك الوادم خلهه يا دكتور
بلكي اذنوب عمرك دعوه تمحيهه
من أحيا نفس ربنه بكتابه يگول
چن الناس كلهه اليوم يحيهه
وما خسران اذا ساعدت هاي الناس
والعباس من تموت تلگيهه
عوف الدنيه كلهه اولا تهم بالمال
لأن هالدنيه والله الموت تاليهه
شلك بالقصور وأنته تعرف زين
تاليك تموت المن تخليهه
واذا تترك الدنيه وترحم انته الناس
ألك ربك بجنته قصور يبنيهه